حب اللى بتعمله الى ان ياتى الوقت انك تعمل اللى تحبه

اول شغل اشتغلته فى حياتى اشتغلت فيه حوالى شهرين بقوم بشىء يبدو تافه جدا ومافيش ولاواحد من المهندسين كانوا عاوزين يشتغلوها لانها شغلانه مافيهاش اى قيمة ولا خبرة ولا معنى كانك بتقيس حاجات بالمسطرة وتحاول ترسمها على الكمبيوتر.

المهم كنت متضايق جدا وكان فى ارادتى ان اختارها او لا.
ولكن ربنا الهمنى بشىء عجيب تمسكت به 

قلت لنفسي حب اللى بتعمله الى ان ياتى الوقت انك تعمل اللى تحبه.

وابتديت احبب نفسي فى الشغلانة اللى مافيهاش اى حاجة تتحب.
وبعد شهرين من العمل المستمر اترسمت لوحة تليفزيون جولدستار بالكامل و بعد كدة المبرمجين وصلوها بالبرامج اللى متوصلة باجهزة الجودة
وبقت كل مرة التقرير يشتغل يظهر فى اللوحة المكان اللى محتاج يتغير او يتصلح وهذ الخاصية ماكانتش موجودة خالص كان التقرير بيطلع رقم الجزء اللى مششغال.


وبعد كدة كل الناس شكرونى والمدير لما زارنا من المانيا شكرنى جدا على المجهود الغير عادى اللى عملته و ازاى ان ده غير فى شكل المشروع بالكامل.


منذ هذه اللحظة الى الان فى خلال حوالى 20 سنة كل مرة انا اللى بختار الشغل لنفسي دايما بختار الشغل اللى بحبه حتى مجال شغلى ونوعيته اتغيرت.

كتبت الكلام ده لان فى ناس كثير بيبقوا لسة جداد فى مجال الحياة وبيحملوا شهدات فى حاجات متخصصة و بيشتغلوا فى شركة كبيرة و لكن يفاجئوا فى الواقع ان مطلوب منهم يعملوا حاجات تبدو تافهة او مش لزيزة ولا شيقة و لا و لا
وده طبعا لان كل واحد شغال بيقى مظبط الدنيا على مزاجه.

لكن مفتاح النجاح ان لو انت مجبر ان تعمل شىء و غير قادر على تغيره او تبديله
حبه فى الاول و شوف الحاجات الكويسة اللى فيه اللى غيرك ماشافهاش و اعمله بمنتهى الهمة و النشاط

بعد كدة هاتلاقى ربنا بيقولك كنت امينا على القليل اقيمك على الكثير